Anyi kira ga musulmai da su dage wajen neman halal bisa koyarwar al-Qur’ani mai girma.

Limamin masallacin Juma’a na Usman Danfodio dake Bauchi Imam Aminu Rabi’u, yayi kira ga musulmi musamman matasa da su dage wajen neman halaliyarsu, bisa koyarwar al-Qur’ani mai girma.

Imam Aminu Rabi’u yayi wannan kira ne cikin Hudubarsa ta sallahr Juma’a, inda yayi godiya wa Allah bisa dimbin baiwa da albarka da Ya saukar a bayan kasa, don anfanin bil-adama.

Yayi kira ga musulmi su kyautata imaninsu da Allah a dukkan lokaci, domin su rabauta da rayuwa mai kyau anan duniya da gobe kiyama, yana mai tabbatar da cewa kowa zaiyi bayanin abubuwan da ya aikata a ranar kiyama.

Malamin ya kuma ja hankalin musulmi su guji karban basussuka na sharholiya, roko da tara dukiya ta kowane hali, a madadin haka, suyi kokari wajen neman halal. Sannan yayi kira ga iyaye su kai yaransu makaranta na addini da na boko, don su zama yaran kwarai a tsakanin al’umma, yana mai addu’ar Allah Ya kara wa naira karfi akan takardar kudin dala, Ya kuma wanzar da zaman lafiya a kasar nan da duniya baki daya.